2026-жылдагы жазгы талаа иштерине агросектордун даярдыгы тууралуу маалымат «Мекенчил» депутаттык тобунун 30-январдагы жыйынында каралды.
Суу ресурстары, айыл чарба жана кайра иштетүү өнөр жайы боюнча биринчи орун басары Жаныбек Керималиев сугат объектилерине даярдык иштеринин, ошондой эле үрөн, жер семирткичтер жана күйүүчү май материалдары менен камсыздоонун белгиленген планга ылайык жүргүзүлүп жатканын билдирди.
Жыйында депутаттар сугат системаларын куруу жана калыбына келтирүү, сугат суусу менен камсыздоо, ошондой эле ГСМ, минералдык жер семирткичтер жана жеңилдетилген кредит берүү маселелерин көтөрүштү. Ошондой эле фитосанитардык контролду, агросекторго илимий иштеп чыгууларды киргизүүнү, айыл чарба техникаларын лизингге берүү жана кайра иштетүүнү жакшыртуу жана региондорду өнүктүрүү үчүн реформаларды жүргүзүү зарылдыгын талкуулашты.
Мындан тышкары, жыйында Бишкек шаарынын 2050-жылга чейинки Генералдык планынын долбоору тууралуу маалымат берилди. Мэрдин орун басары Азамат Кадыров бул документтин даярдыгынын учурдагы абалы тууралуу айтып берди, депутаттар анын бекитүү процедураларын, «кызыл сызыктарды» өзгөртүүнү, турак үйлөрдү бузууну, жер амнистиясын ишке ашырууну жана учурдагы генералдык пландагы айрым жоболорду сактоону талкуулашты.
