Кыргыз Республикасынын Маданият, маалымат, спорт жана жаштар саясаты министрлиги киноиндустрияны колдоо жана мамлекеттик заказдарды бөлүштүрүү үчүн жаңы ыкмаларды киргизүүгө киришти. Бул тууралуу министрдин орун басары Марат Тагаев билдирди.
Анын айтымында, бул максаттар үчүн атайын жобо эки ай мурун бекитилген. Пилоттук долбоордун алкагында 2025-жылдын аягында коммерциялык негизде эки фильмдин өндүрүшү башталат, тартуу иштери 2026-жылдын ортосуна пландалууда, андан кийин тасмалар прокатка чыгат.
Тагаев ошондой эле ар кандай өндүрүүчүлөр менен кызматташуунун маанилүүлүгүн белгиледи.
«Мамлекетте 80ден ашык жеке киностудия бар, биз аларга керектүү колдоону көрсөтүүгө даярбыз. Мурда мамлекеттик заказдарды болгону бир нече режиссер «Кыргызфильм» аркылуу алышчу, бирок азыр биз бардык каалагандар үчүн ачыкпыз. Бир топтун монополиясы мурдагыдай болбойт», - деп баса белгиледи ал.
