Кыргызстанда критикалык минералдар секторун колдоо үчүн мамлекеттик программа иштелип чыкты, анын алкагында 22 критикалык мааниге ээ минералдар белгиленди. Табигый ресурстар, экология жана техникалык көзөмөл министринин орун басары Асель Райымкулова бул маалыматты Жогорку Кеңештин комитетинин жыйынында бөлүштү.
Ал өзүнүн сөзүндө кен казуу тармагындагы лицензиялар боюнча маалыматтарды да сунуштады. «2025-жылы 320 лицензия жокко чыгарылды. Учурда өлкөдө 2014 лицензия иштеп жатат. Алардын ичинен 204 алтынды, 43 металлдарды, 46 мунай жана газды, 367 көмүрдү, 703 жер астындагы сууларды жана 651 минералдык эмес чийки заттарды казып алууга тиешелүү», - деп кошумчалады ал.
