Кыргызстандык сатуучулар эми бардык керектүү документтерди алып, тоскоолдуксуз маркетплейстерге өз товарларын жибере алышат. Бул тууралуу «Кыргыз экспорт» экспортту өнүктүрүү жана илгерилетүү борборунун директору Урмат Такиров «Кабар» агенттигинде өткөн пресс-конференцияда билдирди. Такировдун айтымында, мурда маркетплейстерге жеткирүү боюнча жаңы эрежелерден улам жүктөөлөрдө кыйынчылыктар болгон. Россия Федерациясынын чек арасындагы көйгөйлөр биринчи кезекте жеңил өнөр жай продукциясына таасир эткен, аны Россиянын Федералдык бажы кызматынын мобилдик топтору текшерген.
«Жаңы кырдаалды чечүү үчүн жыл башында Евразия экономикалык комиссиясынын алкагында бир нече сүйлөшүүлөр өткөрүлгөн. Бул талкууларга Казакстан, Россия Федерациясы, ошондой эле Wildberries жана Ozon маркетплейстеринин өкүлдөрү катышкан, ал эми жыйындардын бир бөлүгү жаңы жылдык майрамдар учурунда да өткөн», - деп кошумчалады ал.
Сүйлөшүүлөрдүн натыйжасында, Такиров белгилегендей, тараптар компромисске жетишкен, эми кыргыз сатуучулар Россиянын мыйзамдарын сактап, документтерин туура толтуруп, маркетплейстерге товар жиберүүнү уланта алышат.
«Товарларды жиберүүдө бардык коштоочу документтерди, мисалы, ЦМР, ТТН жана электрондук эсеп-фактураны (ЭСФ) даярдоо зарыл. Электрондук эсеп-фактура чек арадан өтүү учурунда документтердин комплектинде болушу керек», - деп кошумчалады борбордун жетекчиси.
Мындан тышкары, Такиров комиссиянын чечимдеринен кийин Кыргыз Республикасынын Мамлекеттик салык кызматы зарыл өзгөртүүлөрдү киргизгенин белгиледи. Эми салык төлөөчүлөрдүн кабинеттеринде маркетплейстерге товар жүктөө үчүн арналган жаңы ЭСФ формасы жеткиликтүү.
