Байгончоковдун айтымында, белгиленген жылдарда социалдык объектилерди курууга жана модернизациялоого, аймактарды көрктөндүрүүгө, жолдордун абалын жакшыртууга жана башка актуалдуу маселелерди чечүүгө негизги көңүл бурулду. Бул демилгелерди каржылоо жергиликтүү бюджеттин эсебинен, ошондой эле ар кандай институттардын ресурстарын тартуу жана республика деңгээлинде колдоо менен жүргүзүлдү.
2025-жылы борборду өнүктүрүүгө Кыргыз Республикасы Стабилизациялык фондунан 2,9 млрд сом кошумча бөлүндү. Бишкектин 2025-жылга карата жалпы бюджетинин көлөмү 30,5 млрд сомго жетти, бул бекитилген пландан 7-8 млрд сомго ашык. Бюджеттин ашып кетиши 1 млрд сомдон ашты.
Байгончоков 2015-жылдан 2020-жылга чейин шаар бюджетинин көлөмү болжол менен 40%га өскөнүн, ал эми акыркы беш жылда, 2020-жылдан 2025-жылга чейин, анын көлөмү үч эсе көбөйгөнүн белгиледи. Бул шаар мүмкүнчүлүктөрүнүн кеңейишин, жаңы социалдык ишканалардын жана мекемелердин ачылышын, ошондой эле жаңы социалдык объектилердин пайдаланууга берилүүсүн билдирет.
2026-жылга карата борбордун бюджетинин көлөмү 32,8 млрд сом деп пландалууда. Муниципалитет бюджетти аткарууну камсыз кылууга жана көрсөткүчтөрдү жылдын аягына чейин жогорулатууга ниеттенүүдө, шаардык кенештин депутаттары менен биргеликте киреше бөлүгүн көбөйтүү боюнча иштерин улантууда.
Мындан тышкары, биринчи вице-мэр жол тармагын каржылоонун кыйла көбөйгөнүн белгиледи. Эгер мурда ар бир районго ички жолдор үчүн 160–170 млн сом бөлүнсө, учурда бул сумма 300 млн сомдон ашты. Ошондой эле ар бир районго социалдык инфраструктураны өнүктүрүү үчүн кошумча 200 млн сом бөлүнөт.
2026-жылы муниципалитеттин алдында жарандардын жашоо шарттарын жакшыртууга жана борборду андан ары өнүктүрүүгө багытталган маанилүү милдеттер турат.
