«Органика-агродиалог» талкуулоосунда КНАУнун улук окутуучусу Жазгуль Ибраимова Кыргызстанда органикалык айыл чарба өнүгүшү үчүн аны убактылуу мода катары эсептебешибиз керектигин белгиледи. Ал бул — жердин ден-соолугун сактоонун жана келечектеги муундар үчүн азык-түлүк коопсуздугун камсыздоонун жалгыз жолу экенин айтты.
Жазгуль Ибраимова экология жана ден-соолук маселелери жөн гана кооз фразалар эмес, зарылчылыкка айланып жатканын белгиледи. «Органикалык айыл чарбага өтүү — бул убактылуу мода эмес, илимий негизделген жана экономикалык жактан акылга сыярлык кадам», — деп кошумчалады ал.
Топурак илими жана агрохимия боюнча эксперт катары ал минералдык тыңайткычтар жана химикаттарды көзөмөлсүз колдонуу топурактын өлүмүнө алып келерин эскертти. Бул биологиялык активдүүлүктүн төмөндөшүнө, гумустун жоголушуна жана табигый тең салмактын бузулушуна себеп болот. Ал эми органикалык ыкма топуракка «дем алууга» мүмкүндүк берип, микрофлораны активдештирет жана жердин узак мөөнөттүү туруктуулугун жогорулатат.
Органикалык айыл чарба системасынын негиздери жөнөкөй, бирок натыйжалуу ыкмаларды камтыйт: компост, сидераттарды, биозащита жана туура агротехниканы колдонуу. Бул түшүмдүүлүккө гана эмес, азыктардын сапатына да тиешелүү, бул болсо тамактануу коопсуздугуна олуттуу таасир этет.
Мындан тышкары, өлкө үчүн экономикалык кызыкчылык да бар: ички жана эл аралык базарларда экологиялык жактан таза азыктарга болгон суроо-талаптын өсүшү фермерлерге кирешелерин көбөйтүү жана Кыргызстандын экспорттук потенциалын өнүктүрүү мүмкүнчүлүгүн ачат.
Ошентсе да, Жазгуль Ибраимова органикалык айыл чарбага өтүү дароо болбой турганын мойнуна алат. Бул узак жана татаал процесс, кеңири билимдерди жана мамлекеттик колдоону талап кылат. «Биз, илимпоздор жана окутуучулар, фермерлерге чыгып, консультациялар сунуштап, топуракты талдоо жүргүзүп, бул технологияларды практикада ишке ашырууга жардам берүүгө милдеттүүбүз», — деп жыйынтыктады ал.
