Жогорку Кенеште өткөн жыйында суу ресурстары, айыл чарба жана кайра иштетүү өнөр жайы министри Бакыт Торобаев 2026-жылы Кыргыз Республикасындагы агроөнөржай комплекси 40 миллиард сомдон ашык каражат алат деп билдирди.
Министрдин маалыматына ылайык, бөлүнгөн каражаттар жазгы талаа иштерин эффективдүү жана убагында жүргүзүүгө, ошондой эле фермерлерди колдоого багытталат. Бул байланышта министрлер кабинетинин инвестицияларга байланыштуу бир катар мамлекеттик программаларды жана долбоорлорду ишке киргизери айтылды.
«2026-жылга республикалык бюджетте 6 миллиард сом пландалган, атайын эсептен 1,5 миллиард сом бөлүнөт. Мындан тышкары, мамлекеттик инвестициялык долбоорлордон 11 миллиард сом, капиталдык салымдардан 14,3 миллиард сом жана жети мамлекеттик колдоо программасынан 9,3 миллиард сом бөлүнөт», - деп кошумчалады Торобаев.
