2024-жылы Кыргыз Республикасынын Эсеп палатасы тарабынан жүргүзүлгөн аудиттин жыйынтыгы боюнча Транспорт жана байланыш министрлигинин ишинде финансылык жана процедуралык бузулуулар аныкталды. Ведомствонун басма сөз кызматы текшерүү республикалык бюджеттин аткарылышын, ошондой эле министрликтин жана анын бөлүмдөрүнүн, анын ичинде мамлекеттик ишканалардын ишин камтыганын билдирди. Аудиттин жыйынтыгы менен көрсөтмөлөр жана сунуштар даярдалды, ошондой эле юридикалык баалоону талап кылган фактылар катталды.
Аудит 2251,5 млн сомдук финансылык бузулуулар бар экенин тастыктады, анын ичинен 2081,1 млн сомду калыбына келтирүү керек. Текшерүү учурунда 1668,4 млн сом кайтарылды, анын ичинде 1667,2 млн сом бухгалтердик эсепте оңдолгон жана 1,2 млн сом республикалык бюджетке наличный формада кайтарылган.
Негизги бузулуулар эсепке алуу, таануу жана негизги каражаттарды амортизациялоо боюнча мыйзамдардын бузулушу менен байланыштуу. Мындай бузулуулар 1768,7 млн сомду түздү, бул чыгымдардын убагында капиталдаштырылбашы, анын ичинде капиталдык оңдоолорго кеткен чыгымдар менен байланыштуу. Бул активдердин чыныгы баасын бурмалоо коркунучун жаратат жана финансылык отчеттуулуктун тактыгын төмөндөтөт.
Мындан тышкары, аудит төлөмдөрдү, айыппулдарды жана жаза төлөмдөрүн өндүрүү үчүн зарыл болгон чаралар көрүлбөгөнүн көрсөттү, бул 245,6 млн сомдук бузулууларга алып келди. Жумуштардын убагында аткарылбагандыгы жана графиктен артта калганы үчүн подрядчиктерге айыппулдар коюлса да, бул процесстерди көзөмөлдөө жетишсиз натыйжалуу болду.
Ошондой эле, 150,2 млн сомдук эмгек акы жана башка акча сыйлыктарын төлөөгө ашыкча чыгымдар катталды, бул негизинен нормалардын жана жоболордун туура эмес колдонулушунан келип чыкты.
Бюджеттик каражаттарды капиталдык инвестициялар жана курулуш иштерине пайдаланууда 61,1 млн сомдук олуттуу бузулуулар аныкталды. Мисалы, айрым объекттер боюнча жумуштун көлөмдөрү 22,6 млн сомго негизсиз жогорулаган, ал эми аткарылган иштердин кемчиликтери 38,4 млн сомду түздү.
Мындан тышкары, аудит мамлекеттик сатып алуулардагы жана республикалык бюджеттин капиталдык инвестициялар түрүндө каржыланган инвестициялык долбоорлордун тизмесин түзүүдө көйгөйлөрдү, ошондой эле Жол фондуна жетиштүү каржылоонун жоктугун белгиледи.
Аудиттин аягында тиешелүү мамлекеттик органдарга жана текшерүү субъекттерине жазуу түрүндөгү сунуштар жана көрсөтмөлөр жөнөтүлдү. Аныкталган фактылар юридикалык баалоого жатат жана күнөөлүү кызмат адамдарын жоопкерчиликке тартуу маселеси белгиленген тартипте каралат.
