Өкмөттүн басма сөз кызматынын маалыматына ылайык, жолугушууда JICAнын колдоосу менен Кыргызстанда ишке ашырылып жаткан ар кандай долбоорлор талкууланды. Ишке ашырылган демилгелер жарандардын жашоо деңгээлин жакшыртууга жардам бергендиги белгиленди.
«Бир айыл – бир продукт» долбоору жана япон өкмөтү тарабынан берилген JDS стипендиялык программасы ийгиликтүү жана узак мөөнөттүү кызматташтыктын мисалдары катары белгиленди.
Мындан тышкары, сүйлөшүүлөрдүн жүрүшүндө тараптар транспорт, саламаттык сактоо, энергетика жана адам ресурстарын өнүктүрүү сыяктуу тармактарда гранттык жана техникалык жардам көрсөтүү боюнча бир катар долбоорлордун учурдагы абалын карашты.
Учурда Кыргызстанда JICAнын колдоосу менен 43 долбоор ишке ашырылганын белгилеп өтүү керек. Бул жылы агенттиктин Бишкектеги өкүлчүлүгүнүн ачылганына 25 жыл толот.
