Жолугушууда JICAнын колдоосу менен өлкөдө ишке ашырылган долбоорлор талкууланды. Катышуучулар биргелешип иш алып баруу алкагында калктын жашоо деңгээлин жакшыртууга багытталган бир нече узак мөөнөттүү демилгелерди ишке киргизгенин белгилешти.
Ушул кызматташтыктын ийгиликтүү мисалдары катары «Бир айыл — бир продукт» программасы жана Япония өкмөтү тарабынан сунушталган JDS стипендиялык программасы белгиленди.
Мындан тышкары, тараптар гранттарды жана техникалык жардамды берүү боюнча долбоорлордун учурдагы прогресси, транспорт, саламаттык сактоо, энергетика жана адам ресурстарын өнүктүрүү сыяктуу тармактар боюнча талкуулашты.
Министрлер Кабинетинин маалыматына ылайык, бүгүнкү күндө Кыргызстанда JICAнын колдоосу менен 43 долбоор ишке ашырылган. 2026-жылы аталган агенттиктин республикадагы өкүлчүлүгүнүн 25 жылдыгы белгиленет.
