2026-жылы Уч-Курган гидроэлектр станциясында эки агрегаттын: №1 жана №2 параллель реконструкциясы башталат.
Энергетика министрлигинин маалыматына ылайык, Уч-Курган ГЭСин модернизациялоо Пакет-2 алкагында жүргүзүлүп, башкы подрядчы катары Кытайдын CNEEC (China National Electric Engineering Co. Ltd.) компаниясы чыгат.
Агрегаттарды параллель реконструкциялоо долбоордун мөөнөтүн кыйла кыскартууга жана натыйжалуулугун жогорулатууга мүмкүндүк берет. Эки агрегат үчүн даярдоо жана инженердик-техникалык иштер башталды. Гидроагрегат №2 боюнча иштер 2026-жылдын 1-февралында, ал эми гидроагрегат №1 боюнча 2026-жылдын 1-мартында башталат.
Учурда агрегат №2 үчүн статоранын стержендерин ширетүү иштери жүргүзүлүүдө, ошондой эле ротордун спицаларын чогултуу жана дефектоскопиялык көзөмөл жүргүзүлүүдө. Параллель түрдө агрегат №1 үчүн долбоордук-техникалык даярдык жүрүүдө.
Бардык иштер бекитилген графикке ылайык, бардык техникалык нормалар жана өнөр жай коопсуздугу эрежелери сакталуу менен жүргүзүлөт.
Параллель реконструкциянын аркасында станциянын кубаттуулугу этап-этабы менен жогорулайт. Модернизациянын натыйжасында 2025-жылы Уч-Курган ГЭСинин кубаттуулугу 18 МВтка жогорулады, ал эми 2026-жылдын аягына чейин жалпы өсүш 36 МВтты түзөт.
Уч-Курган ГЭСинин модернизация долбоорунун максаты гидроэнергетикалык жабдуулардын ишенимдүүлүгүн жана натыйжалуулугун жогорулатуу, ошондой эле станциянын туруктуу жана узак мөөнөттүү иштешин камсыз кылуу болуп саналат.
