Жогорку Кенештин жыйынында экономика жана соода министринин орун басары Биназир Нурланова Кыргызстандагы кредиттик маалыматтар боюнча мыйзамга өзгөртүүлөрдү киргизүү тууралуу мыйзам долбоорун сунуштады.
Ал учурдагы оң кредиттик маалыматтарды сактоо практикасы 7 жылды, терс маалыматтарды сактоо практикасы болсо 5 жылды түзөрүн белгиледи.
«Мындай кырдаал мурда кредиттик милдеттенмелерин ийгиликтүү аткарган карыз алуучулар үчүн көйгөйлөрдү жаратууда, бирок банктарга кайра кайрылганда баш тартуулар менен кездешүүдө. Натыйжада жарандар жана ишкерлер микрокредиттик уюмдарга же расмий эмес каржылоо булактарына кайрылууга мажбур болушууда», - деп баса белгиледи Нурланова.
Мындан тышкары, ал Кыргызстанда 20 миңден ашык кичи жана орто ишкердик субъектилери бар экенин, ал эми жеке ишкерлердин жалпы саны 500 миңден ашып, алардын 96,1% микропредприятиялар экенин кошумчалады.
Сунушталган өзгөртүүлөргө ылайык, мыйзам долбоорунун демилгечилери терс кредиттик маалыматтарды сактоо мөөнөтүн 5 жылдан 3 жылга, оң маалыматтарды сактоо мөөнөтүн болсо 7 жылдан 5 жылга кыскартууну пландаштырууда. Ошондой эле, 10 миң сомго чейинки кредиттер боюнча маалыматтарды бир жыл бою сактоо мөөнөтүн белгилөө сунушталууда, деди ал.
