«Аалам Строй» компаниясына 3 миллион сом өлчөмүндө айып пул салынды. Лицензиянын убактылуу токтотулушу 17-январда жүргүзүлгөн текшерүүдөн кийин болду, ага курулуш министри Нурдан Орунтаев катышкан.
«Текшерүүнүн натыйжасында, Анкара көчөсүндөгү 2; Анкара көчөсүндөгү 3/6; Анкара көчөсүндөгү 3а даректериндеги, ондон ашык блоктон турган турак жай комплексинин курулушунда курулуш мыйзамдары жана коопсуздук эрежелери боюнча олуттуу бузуулар аныкталды. Мындан тышкары, компания курулуш этаптарын текшерүү үчүн жеке лабораторияларды колдонгону маалым болду. Ошондой эле, турак жай комплексинин блоктору үлүш ээлерине мыйзамсыз өткөрүлгөнү аныкталды», - деп түшүндүрүштү Министрлер кабинетинде.
Маалымат:
«Аалам Строй» компаниясы 2013-жылдын 4-февралында Кыргыз Республикасынын Юстиция министрлигинин электрондук юридикалык жактар реестри боюнча катталган. Негиздөөчүсү Исаков Уланбек Абыласович, ал эми жетекчиси – Аалиев Ниязбек Үсөнович (маалыматтар 2026-жылдын январь айына актуалдуу).
Көрсөтүлгөн даректер «Аалам Сити 1» жана «Аалам Сити 2» деген эки турак жай комплексинин курулушуна тиешелүү.
