Пезешкиан жаңы убактылуу бийлик органы маркум жогорку лидер Али Хаменейдин белгилеген багытына ылайык иш алып барарын белгиледи.
Анын айтымында, "Кудайдын жардамы менен, кеңеш имамдын жана кымбат лидердин жолун улантат. Ирандын Куралдуу күчтөрү душмандын аскердик объекттерине сокку улантат", - деп кошумчалады президент.
Ал ошондой эле АКШ жана Израилдин "максаттарына жетүү" үчүн лидерди өлтүрүү аракетинин ийгиликсиз болорун жана анын миссиясы улантыларын баса белгиледи. Пезешкиан жарандарды көчөлөрдө жана мечиттерде чогулууга чакырып, "душмандардын планын бузууга" жана өлкө үчүн дуба кылууга үндөдү.
Али Хаменей 28-февралда АКШ жана Израилдин биргелешкен аскердик операциясынын натыйжасында каза болду. Тегерандагы резиденциясы жогорку жетекчиликтин жыйыны учурунда кол салууга кабылды, анын натыйжасында анын үй-бүлөсүнүн мүчөлөрү жана Ислам революциясынын коргоочулары менен Коргоо министрлигинин жогорку кызматкерлери да каза болушту. Хаменей 1989-жылдан бери Иранды башкарып келген. Мамлекетте 40 күндүк аза күтүү жарыяланды.
Убакыттуу кеңеш Ирандын Конституциясынын 111-беренесине ылайык түзүлгөн. Анын курамына президент, Жогорку соттун төрагасы жана Конституциянын коргоочулар кеңешинин бир мүчөсү кирет. Бул орган жаңы жогорку лидер шайланганга чейин өлкөнү башкарууга милдеттүү, аны 88 эксперттер кеңешинин мүчөсү дайындайт.
ILNA агенттигинин маалыматына ылайык, Тегерандын Нармак районундагы кол салуулар натыйжасында Ирандын мурдагы президенти Махмуд Ахмадинежаддын каза болушу мүмкүн, бирок бул маалыматты расмий түрдө тастыктоо азырынча жок.
