Иллюстративдик сүрөт
Украинанын Жогорку Радасы 14-январда, шаршемби күнү, аскердик абалды жана жалпы мобилизацияны 90 күнгө узарткан мыйзам долбоорлорун кабыл алды. Бул мыйзам долбоорлорунун демилгечиси Украина президенти Владимир Зеленский.
Ошентип, өлкөдөгү аскердик абал 3-февралдан 4-майга чейин күчүндө болот. Мыйзам долбоорун кабыл алууга 330 элдик депутат добуш берди, минималдуу талап кылынган добуш саны 226. Ошондой эле, жалпы мобилизацияны узартууга 312 депутат добуш берди, бул дагы 90 күндү түзөт.
Украинада аскердик абал 2022-жылдын февраль айында Россиянын аскердик басып кирүүсүнүн башталышында киргизилген. Ошол эле мезгилде президент Зеленский жарандардын жалпы мобилизациясы жөнүндө жарлыкка кол койгон. 2025-жылдын августунда украин өкмөтү 18 жаштан 22 жашка чейинки жаштардын өлкөдөн чыгышына уруксат берди.
