Маселени талкуулоодо депутат Болот Сагынаев мектептик лигалардын футбол жана волейболду активдүү өнүктүрүүгө чоң таасири бар экенин белгиледи. Ал мектепте өткөрүлгөн туруктуу турнирлер балдардын спортко болгон кызыгуусун кыйла жогорулатып, алар ар кандай мелдештерге активдүү катышып, жогорку жыйынтыктарды көрсөтүшкөнүн айтты.
Депутат тарабынан көтөрүлгөн маселелердин арасында мектептик лиганын ишин кайра жандандыруу да болду.
Урмат Асанбаев долбоордун кайрадан башталганын тастыктады. Ал командалардын каттоосу аяктаганын жана ушул сезондо болжол менен 2 миң команда катышып жатканын белгиледи.
Агенттиктин башчысы мектептик лигада үч спорт түрү: футбол, волейбол жана баскетбол бар экенин кошумчалады. Келечекте үстөл тенниси жана улуттук спорт түрлөрүн кошуу пландалууда, бирок Урмат Асанбаевдин айтымында, спорттук инфраструктуранын жетишсиздиги айрым дисциплиналардын өнүгүшүнө тоскоол болууда.
Ал ошондой эле мектептик лиганын бешинчи сезону башталганын жана финалдык оюндар 1-9-май аралыгында өткөрүлөрүн билдирди.
