КРдин Физикалык маданият жана спорт боюнча мамлекеттик агенттигинин директору Казыбек Молдажиев менен Yunnan SCO Culture and Sports Co Ltd компаниясынын жетекчиси Чжан Синдин ортосунда өткөн жолугушууда Кыргызстан менен Кытайдын ортосундагы спорттук кызматташтыктын келечеги талкууланды.
Переговорлордун жүрүшүндө Бишкекте өткөрүлүүчү Run the Silk Road эл аралык марафонун уюштуруу маселелери, ошондой эле Шанхай кызматташтык уюму алкагында спорт министрлеринин жолугушуусуна даярдык тууралуу сөз болду.
Тараптар Кыргызстандагы жети регионду колдоо, регионалдык өнөктөштүктү өнүктүрүүгө, спорттук инфраструктураны жакшыртууга жана кызматташтыкты кеңейтүүгө багытталган биргелешкен демилгелер жана долбоорлор боюнча идеяларды алмашышты.
Жолугушуунун жыйынтыгы менен көрсөтүлгөн багыттар боюнча ары карай кызматташууга жана аракеттерди координациялоого даярдык бекемделди.
Жолугушуу конструктивдүү атмосферада өтүп, эки тарап кыргыз-кытай байланыштарын физикалык маданият жана спорт тармагында өнүктүрүүгө кызыктар экенин билдиришти.
Ошондой эле, Run the Silk Road эл аралык марафону 2026-жылдын 2-майында Ысык-Көлдүн жээгинде өткөрүлөрү пландалууда, анда коңшу жана алыс чет өлкөлөрдөн спортчулар жана туристтердин катышуусу күтүлүүдө.
