Кыргызстандын Улуттук телерадиокорпорациясынын генеральдык директору Уланбек Сатиев берген маалыматка ылайык, «Спорт» телеканалы биринчи жолу Олимпийдик оюндардын түз трансляциясы үчүн лицензия сатып алды. Ошентип, кыргызстандыктар телеканал аркылуу, ошондой эле кабельдик тармактар жана мобилдик тиркемелер аркылуу реалдуу убакытта мелдештерди көрө алышат.
Ал бул жаңылык кыргызстандыктар үчүн эл аралык маанилүү спорттук иш-чараларды байкоо мүмкүнчүлүгүн кыйла кеңейтээрин кошумчалады.
Олимпийдик оюндардын ачылыш аземи 6-февралдан 7-февралга караган түнү, саат 01:00дө «НТРК Спорт» телеканалында түз эфирде көрсөтүлөт.
2026-жылдын 6-февралынан 22-февралына чейин Италияда өтө турган XXV кышкы Олимпийдик оюндарга 90дан ашык өлкөдөн 2,9 миңден ашык спортчу катышат. Негизги окуялар Милан, Кортина-д’Ампеццо жана өлкөнүн түндүк бөлүгүндөгү башка шаарларда өтөт.
Кыргызстанды бул кышкы Олимпиадада тоо лыжасы жана лыжа жарыштарында катышчу эки спортчу көрсөтөт.
