XIII Бишкек шаардык кеңешинин сессиясында мэр Айбек Жунушалиев депутаттардын жана коомчулуктун пикирлерин эске алып, «Сүрөтчүлөр үйү» жайгашкан жер тилкеси менен байланышкан маселени күн тартибинен алып салууну сунуштады.
Мэриянын маалыматына ылайык, мэр маселенин кошумча иштелип чыга турганын баса белгилеп, жер тилкеси муниципалитеттин менчигинде кала турганын айтты. Ошол эле учурда, «Сүрөтчүлөр үйү» Кыргызстандын мыйзамдарына ылайык, анын кийинки пайдаланылышы боюнча акыркы чечимдер кабыл алынганга чейин өз ишин кадимкидей улантат.
Бишкек мэриясы буга чейин «Сүрөтчүлөр үйү» үчүн Союзга берилген Чүй проспектиси, 108 дарегиндеги жердин пайдалануу шарттарын бузуу фактысы боюнча мурда кабыл алынган чечимди жокко чыгарууну сунуштаганын белгилөө керек.
Бул объект белгиленген максатта пайдаланылган эмес: анын жайларында жеке нотариустун кеңсеси, автосалон, дүкөн, авиакасса жана башка офис жайлары сыяктуу коммерциялык ишканалар жайгашкан.
