2025-жылдан баштап Кыргызстанда берилүүчү жаңы үлгүдөгү айдоочулук күбөлүктөр Вена конвенциясынын бардык талаптарына жооп берет. Бул кыргызстандыктарга Европалык Союздун өлкөлөрүндө жумушка орношуу үчүн «Код 95» квалификациялык картасын тоскоолдуксуз алууга мүмкүнчүлүк берет. Бул тууралуу «Кабар» агенттигиндеги пресс-конференцияда ГЦ РТСиВСтин айдоочулук курамы бөлүмүнүн башчысы Адилет Сейталиев билдирди.
«Код 95» картасы C, D жана E категорияларындагы айдоочулардын профессионалдык квалификациясын тастыктаган милдеттүү документ болуп саналат. Бул документ транспорттук компанияларда иштөө жана жүк, ошондой эле жүргүнчү ташуу боюнча коммерциялык жүк ташууларды жүргүзүү үчүн зарыл.
Сейталиев ошондой эле «Код 95» алууга арналган курстун узактыгы биринчи айдоочулук күбөлүктүн алынган датасына жараша болот деп түшүндүрдү:
- Тажрыйбалуу айдоочулар үчүн (кубөлүк 2009-жылдан мурун алынган): адатта 1–2 жумага созулган ылдамдатылган курс каралган.
- Жаңы айдоочулар үчүн (кубөлүк 2009-жылдан кийин алынган): 4 жумага созулган толук баштапкы квалификация курсун өтүү талап кылынат.
«Азыркы учурда биздин жарандар жаңы күбөлүктөрдүн эл аралык стандарттарга жооп бербегендиги себептүү «Код 95» ала албай калган учур катталган жок. Биздин күбөлүктөрдүн дизайны жана техникалык мүнөздөмөлөрү чет өлкөлүк жумуш берүүчүлөр жана көзөмөл органдары тарабынан толугу менен кабыл алынат», - деди Сейталиев.
