Кыргыз Республикасынын Счеттук палатасы тарабынан жүргүзүлгөн текшерүүнүн жыйынтыгы боюнча, курулуш тармагында 2024-жылы жалпы суммасы 1,58 миллиард сомго финансылык мыйзам бузуулар аныкталган. Аудит курулуш, архитектура жана турак-жай-коммуналдык чарба министрлигинин, ошондой эле анын карамагындагы уюмдардын ишмердүүлүгүн камтыган.
Палатанын маалымат кызматына ылайык, мыйзам бузуулардын негизги бөлүгү дебитордук карызды туура эмес эсептөө менен байланыштуу.
Аудит 2024-жылдын 1-январынан 31-декабрына чейин жүргүзүлгөн жана Министрликтин бюджеттик мыйзамдарын сактоо жана бюджеттин аткарылышын текшерүүгө багытталган.
Текшерүүнүн жыйынтыгы боюнча финансылык эсептөөлөрдө жана курулуш иштерин аткарууда олуттуу мыйзам бузуулар аныкталган.
Аныкталган финансылык мыйзам бузуулардын жалпы суммасы 1 миллиард 585 миллион 293 миң сомду түзөт, анын ичинен 1,17 миллиард сом дебитордук карызды эсептөө боюнча мыйзам бузууларга тиешелүү.
Аудит ошондой эле төмөнкү мыйзам бузууларды аныктады:
- курулуш-монтаждык иштердин баасын жана көлөмүн жогорулатуу — 166 миллион 87 миң сом;
- бюджеттик каражаттарды максатсыз пайдалануу — 85 миллион;
- Бирдиктүү казначейдик эсептен тышкаркы операциялар — 40 миллиондон ашык;
- айлык акы жана башка төлөмдөрдү төлөдө мыйзам бузуулар — 24 миллиондон ашык;
- эсепке алынбаган мүлк — 26 миллион сомдон ашык.
Ошондой эле бюджетке каражаттарды убагында жана толук эмес которуу, негизсиз аванс төлөмдөрү жана капиталдык салымдарды ишке ашырууда мыйзам бузуулар катталган.
Счеттук палатасынын маалыматы боюнча, мыйзам бузуулардын жалпы суммасын калыбына келтирүүгө 349 миллион 414 миң сом талап кылынат, анын ичинен 122 миллион 191 миң (35 пайыз) сом аудит учурунда кайтарылган.
Текшерүүнүн жыйынтыктары боюнча ведомствого аныкталган мыйзам бузууларды жоюу, финансылык дисциплинаны жогорулатуу жана бюджеттик каражаттарды пайдалануунун натыйжалуулугун жакшыртуу боюнча сунуштар берилген.
