Кыргызстанда үй-бүлөлүк дарыгерлердин маянасы 1-апрелден баштап 31 322 сомго жогорулайт. Бул тууралуу Саламаттык сактоо министрлигинин бюджеттик саясат жана финансылык анализ башкармалыгынын жетекчиси Клара Осконбаева «Кабар» агенттигинин «Элден собол» программасында билдирди.
Саламаттык сактоо системасында ар бир адистин өз коэффициенти бар, негизги маяна 7040 сомду түзөт. Осконбаева бул бардык кызматкерлер үчүн бирдиктүү негизги маяна экенин, бирок коэффициенттер ар кандай экенин белгиледи. Дарыгерлер эки категорияга бөлүнөт: үй-бүлөлүк дарыгерлер жана башка адистер.
«Учурда үй-бүлөлүк дарыгерлер үчүн коэффициент 2,85ке жогорулаууда. Азыркы 3,25тен 1-апрелден баштап 4,45ке чейин өсөт», — деп түшүндүрдү ал. Бул, жаш дарыгерлер ординатурада бир жыл иштеп, Үй-бүлөлүк медицина борборуна орношсо, көрсөтүлгөн сумманы негизги маяна катары алышат дегенди билдирет.
Бүгүнкү күндө, 1-апрелге чейин, үй-бүлөлүк дарыгердин маянасы 22 880 сомду түзөт. Ошондой эле алыскы тоолуу аймактарда же айыл жергесинде иштегендиги үчүн компенсациялар сыяктуу кошумча төлөмдөр каралган.
«Президент Элдик курултайда президенттик компенсациялык төлөмдү киргизүүнү сунуштады. Дарыгерлер жана медайымдар айына 15 000 сом, ал эми жогорку медициналык персонал 5 000 сом алышат», — деп кошумчалады Осконбаева.
