Пресс-борбордун маалыматына ылайык, жыйын учурунда кыргыз-кытай кызматташтыгынын учурдагы абалы жана келечеги талкууланды.
Кыргызстан менен Кытайдын ортосундагы кызматташтык эки өлкөнүн саламаттык сактоо министрликтеринин ортосундагы келишимге негизделген жана соода-экономикалык кызматташтык боюнча өкмөттөр аралык комиссиянын алкагында, ошондой эле Шанхай кызматташтык уюму форматында активдүү өнүгүүдө.
Дамир Осмонов кытай тараптын Кыргызстандагы саламаттык сактоону өнүктүрүүгө, гуманитардык жардам, медициналык жабдуулар жана дары-дармектерди жеткирүү, ошондой эле кыргызстандык медиктер үчүн Кытайда билим берүү программаларын жана стажировкаларды уюштурууда маанилүү салым кошуп жатканын белгиледи.
Талкуу учурунда кытай тарап практикалык кызматташтыкты кеңейтүү үчүн бир катар жаңы демилгелерди сунуштады. Атап айтканда, күн тартибинде катаракта операцияларын акысыз өткөрүү пландары жана тума жаралган жүрөк кемтиги бар балдарга медициналык жардам көрсөтүү программаларын улантуу маселелери каралды.
Мындан тышкары, мурда Кытайда жыл сайын Кыргызстандан 10 баланын жүрөгүндө оор кемтиктер менен операциялар өткөрүлөрү тууралуу маалымдалган.
Фото МЗ КР
Ошондой эле Синьцзян-Уйгур автономдуу районунун элдик ооруканасы менен кызматташуу перспективалары, өз ара визиттерди уюштуруу жана биргелешкен медициналык мекемелерди түзүү мүмкүнчүлүктөрү талкууланды.
Кыргыз-кытай салттуу медицина боюнча илимий-изилдөө борборун түзүү маселелерине, ошондой эле фармацевтика тармагында жана дары өсүмдүктөрүн пайдаланууда өнөктөштүктү өнүктүрүүгө өзгөчө көңүл бурулду.
Жыйындын жыйынтыгы боюнча тараптар медициналык инфраструктураны өнүктүрүү, медициналык жардамдын сапатын жакшыртуу жана калктын заманбап медициналык кызматтарга жеткиликтүүлүгүн кеңейтүүгө багытталган эки тараптуу кызматташтыкты күчөтүүгө даярдыктарын билдиришти.
