Милициядан билдиришкендей, бул иш-чаралар үй-бүлөлүк зомбулуктун алдын алуу, «Арсенал» операциясы алкагында укук бузууларды алдын алуу, ошондой эле жарандарды интернет алдамчылыгынан коргоого багытталган.
Түшүндүрүү ишинин жүрүшүндө жарандарга акыркы убакта белгисиз адамдар ар кандай мессенджерлер, социалдык тармактар жана телефон чалуулары аркылуу, өздөрүн туугандар же тааныштар катары көрсөтүп, акча сурап жаткан учурлар көбөйгөнү маалымдалууда. Мындан тышкары, жарандардын жеке маалыматтарын жана банк реквизиттерин шектүү шилтемелерди жиберүү жолу менен алуу аракеттери катталууда.
Ошондуктан милиция кызматкерлери жарандарды төмөнкү коопсуздук чараларын сактоого чакырышууда:
- шектүү шилтемелерге өтпөөгө;
- белгисиз номерлерден келген SMS же билдирүүлөргө ишенбөөгө;
- эгер билдирүү же чалуу сиздин жакындарыңыздын атынан келсе, сөзсүз кайра чалып, маалыматты тактоого;
- кимге болбосун банк карталарынын номерлерин, коддорун жана жеке маалыматтарды билдирбөөгө;
- шектүү чалууга жана билдирүүлөргө жооп берүүдөн качууга жана маалыматты текшерүүгө.
«Эгер сиз же сиздин жакындарыңыз интернет алдамчылыгына кабылып калса, дароо милицияга кайрылыңыз», - деп айтылат билдирүүдө.
Милиция жарандарды этият болууга жана өзүнүн жеке маалыматтарынын коопсуздугуна өзгөчө көңүл бурууга чакырат.
