Документтин негиздемесине ылайык, мыйзам долбоорунун максаты — көчмөн цивилизациялардын мурасын сактоо жана өнүктүрүүгө багытталган мамлекеттик саясатты конституциялык мыйзам деңгелинде бекитүү, ошондой эле Көчмөндөрдүн Дүйнөлүк оюндары үчүн атайын эл аралык статус орнотуу.
Документте Кыргызстандагы учурдагы мыйзамдар маданий жана спорттук маселелерди фрагментардуу жөнгө салып, өлкөнүн көчмөн маданиятын сактоо жана жайылтуу борбору катары ролун баса белгилеген нормаларды камтыбай турганы айтылат.
Кыргызстан тарабынан башталган Көчмөндөрдүн Дүйнөлүк оюндары кыска убакыттын ичинде маанилүү эл аралык таанууга ээ болуп, маданий дипломатиянын жана өлкөнүн имиджин илгерилетүүнүн маанилүү куралына айланды.
Мындан тышкары, 2025-жылдын декабрь айында World Nomad Games товардык белгисине болгон эксклюзивдик укуктар Кыргызстан мамлекетине өткөрүлүп, белгиленген тартипте катталган.
Мыйзам долбоору төмөнкү жоболорду камтыйт:
- Кыргызстанды көчмөн цивилизацияларды сактоо жана өнүктүрүү борбору катары бекитүү;
- Көчмөндөрдүн Дүйнөлүк оюндарына өлкөнүн эксклюзивдик укуктарын юридикалык жактан бекитүү;
- Оюндарды өткөрүү укуктарын башка мамлекеттерге эл аралык келишимдердин негизинде өткөрүп берүү мүмкүнчүлүгү;
- Оюндарды ар бир эки жылда өткөрүү, уюштуруучу өлкөлөрдү алмаштыруу менен.
Бул мыйзамдын кабыл алынышы оюндарды уюштуруу үчүн туруктуу укуктук негизди түзүп, алардын аталышын, символикасын жана концепциясын коргоону камсыз кылат.
Инициаторлор бул документ республикалык бюджеттен кошумча чыгымдарды талап кылбайт жана терс социалдык, экономикалык же укуктук кесепеттерге алып келбейт деп билдиришет.
Эскерте кетсек, Көчмөндөрдүн Дүйнөлүк оюндары биринчи жолу 2014-жылы Кыргызстанда өткөрүлгөн жана этноспортту жана көчмөн элдердин маданиятын жайылтуу үчүн эл аралык платформага айланган. VI Көчмөндөрдүн Оюндары 2026-жылы Кыргызстанда өткөрүлүшү пландалууда.
