Кыргыз Республикасынын айыл чарба, суу ресурстары жана кайра иштетүү өнөр жайы министри Эрлист Акунбеков Сокулук районунда жайгашкан мамлекеттик асыл тукум заводун зыярат кылды.
Бул маалымат айыл чарба министрлигинин басма сөз кызматынан алынды.
Зыярат учурунда министр биолабораторияда ири мүйүздүү малдын генетикалык мүнөздөмөлөрүн жакшыртуу боюнча туруктуу иштер жүргүзүлүп жаткандыгы жана жасалма уруктандыруунун натыйжалуулугун жогорулатуу боюнча маалымат алды. Мындан тышкары, заводго аймактардагы техникалык уруктандыруучулар үчүн суюк азот жеткирүү камсыздалууда.
«Сапатка, санга эмес, басым жасоо керек. Ошол гана генетикалык жактан таза уруктук материалды алууга мүмкүнчүлүк берет. Бул бүгүнкү күндө иштин негизги багыттарынын бири. Ошондой эле жергиликтүү климаттык шарттарга ылайыкташтырылган жана зарыл тесттерден өткөн жайыт өсүмдүктөрүнүн уруктарына көңүл буруу керек», - деп белгиледи министр.
Муну менен катар министр заводдун жетекчисине объекттин толук реконструкциясы үчүн смета долбоорун даярдоону тапшырды. Ал ошондой эле, оңдоо иштеринин прогрессин баалоо үчүн кийинки жумада заводду кайрадан зыярат кылууну пландап жатканын билдирди. ```
