Бүгүн «Манас» эл аралык аэропортуна Джиддадан учуп келген рейс конду, анын бортуна 90 кыргызстандык жаран отурган. Параллелдүү түрдө дагы 120 мекендешибиз Джидда – Ош рейси менен кайтып келишти.
Бишкекке кайтып келгендер Сауд Аравиясындагы сапарлары тууралуу таасирлерин бөлүштү.
Пассажирлердин бири, Рамис, мындай деди: «Биз үйгө учуп кете алган жокпуз, бирок президенттин, муфтияттын жана элчиликтин жардамы менен кайтып келе алдык. Биз 28-февралга караган түнү учуп кетүүнү пландаштырганбыз. Гостиницада жашоону умра уюштурган компания камсыз кылды».
Башка кайтып келген жаран, Торокелди Ашымов, уюштуруу маселелери жогорку деңгээлде чечилгенин айтты.
«Компания баарын уюштурду, менимче, мамлекеттин колдоосу менен бизге учак берилди. Кыргызстандыктар үчүн баары жакшы болду, маанайыбыз көтөрүңкү. Биз эч кандай жарылууларды уккан жокпуз, Меккеде тынчтыкта болдук. Биз учуп кетүүгө даярданып жаттык, бирок ошол күнү бардык рейстер токтотулду. Натыйжада, биз үч күндөн кийин гана кайтып келе алдык», - деп бөлүштү ал.
