Нарын облусунда «Кур-Терек» аттуу 110/35/10 кВ подстанциясынын курулушу башталды. Нарын электр тармактары ишканасынын маалыматына ылайык, бул долбоор жаңы өнөр жай, турак жай жана социалдык объектилерди ишенимдүү электр энергиясы менен камсыздоо үчүн ишке ашырылууда. Ошондуктан баштапкы пландар өзгөртүлүп, 35 кВ «Кур-Терек» подстанциясынын ордуна 2025-жылга карата капитальный планга 110/35/10 кВ подстанциясы жана 10,42 км 110 кВ электр өткөрүү линиясынын курулушу киргизилди.
Ошондой эле, «СЭЗ Нарын — СЭЗ Кашкар» индустриалдык паркында «Эки өлкө - эки парк» долбоору ишке ашырылып, анын алкагында төрт өнөр жай ишканасы курулууда. Алардын туруктуу иштеши үчүн кошумча электр кубаты талап кылынат.
Жаңы долбоордун ишке ашырылышы 110/35/10 кВ «Нарын-1» подстанциясынын жүктөмүн азайтууга жана жаңы объектилерди, мисалы, ГИК тарабынан курулуучу турак жай комплекстерин жана реконструкцияланып жаткан «Нарын» аэропортун туташтырууга шарт түзөт.
Курулуш иштери 2025-жылдын апрель айында башталып, учурда активдүү улантылууда. «Кур-Терек» аймагындагы курулуш аянтчасын убактылуу электр энергиясы менен камсыздоо үчүн 400 кВА кубаттуулуктагы трансформатордук подстанция орнотулду.
Подстанциянын курулушун каржылоону «НЭС Кыргызстан» өз каражаттарынын эсебинен жүргүзүүдө, ал эми объектти пайдаланууга берүү мөөнөтү — 2026-жылдын аягында пландалууда.
