Бул мал сарайын куруу долбоору үчүн болжол менен 85 миллион сом акча каражаты каралган.
Бул долбоор Кызыл-Кия шаарындагы «Нур» фермердик чарбасы тарабынан ишке ашырылууда.
Кызыл-Кия шаарынын мэри Алтынбек Бектуровдун айтымында, бул долбоордун максаты — региондогу тукумдук мал чарбасын өнүктүрүү жана шаар тургундарын сапаттуу жана арзан эт менен камсыздоо.
«Мамлекет тарабынан тукумдук чарбаларды өнүктүрүүгө басым жасалууда. Бул ферманын курулуш долбоору үчүн 1 гектар 75 сотых муниципалдык жер бөлүнгөн.
Долбоордун ийгиликтүү ишке ашырылышы менен, Министрлер кабинетинин №309 токтомуна ылайык, азык-түлүк менен камсыздоо үчүн мамлекеттик фонддон кошумча жерлер бөлүнөт. Курулуш аяктагандан кийин фермердик чарба тукумдук ири мүйүздүү малды Россияга жана Европа өлкөлөрүнө экспорттоону пландаштырууда. Негизги максат — региондо эт-сүт багытындагы тукумдук малды жайылтуу аркылуу азык-түлүк коопсуздугун камсыздоо», - дейт ал.
