Быйыл психология жана педагогика тармагында адистерди даярдоо башталат
Жакында илим, билим берүү, инновациялар, маданият, спорт жана жаштар иштери боюнча комитеттин жыйынында депутат Гулшаркан Култаева мектептерде психологдордун жетишсиздиги маселесин көтөрдү.
Ал министрликтердин өкүлдөрүнө бул тармакта адистердин санын көбөйтүү мүмкүнчүлүктөрү тууралуу суроо берди.
Каржы министринин орун басары Жибек Дуйшеева, кырдаалды комментарийлеп, Билим берүү министрлиги менен кызматташтыкта жобо долбоору иштелип чыкканын белгиледи.
«Бардык зарыл уруксаттардын болушуна карабастан, кадрлардын жетишсиздиги актуалдуу бойдон калууда. Ошондуктан, адистердин квалификациясына жана жетиштүүлүгүнө жараша, райондук деңгээлден баштап, мектептерге бөлүштүрүү менен этап-этабы менен иш жүргүзүү чечими кабыл алынды», — деп кошумчалады ал.
Илим, жогорку билим берүү жана инновациялар министринин орун басары Дурус Козуев жогорку окуу жайларында психология боюнча факультеттер жана кафедралар бар экенин билдирди.
«Анткен менен, акыркы жылдары квалификациялуу психологдордун жетишсиздиги байкалууда. Ошондуктан, бул маселе приоритеттүү болуп калды. Быйыл жаңы адистер — психолог-педагогдорду даярдоо башталат», — деп белгиледи ал.
