Чыгыштагы кырдаалдын начарлашына байланыштуу Кыргызстанда убактылуу аралык штаб түзүлдү. Бул чечим жарандардын мекенине кайтып келишин камсыздоо максатында кабыл алынды. Бул тууралуу Кыргызстан мусулмандарынын Духовдук башкармалыгынын умра бөлүмү маалымдады.
Ушул уюмдун өкүлдөрүнүн айтымында, региондогу кырдаалдын начарлашы ыйык умра зыяратын аткаруу үчүн пландалган авиарейстердин токтоп калуусуна алып келди, бул болсо кыйын кырдаал жаратууда.
Жогоруда айтылганга байланыштуу, ДУМКнын умра бөлүмү учурда Мекке жана Мединада кичи зыяратта жүргөн жарандарга кайрылды.
«Биз сиздерди учурдагы шарттарда сабырдуулук жана түшүнүү көрсөтүүгө чакырабыз. Уюштуруучулардын көрсөтмөлөрүнө баш ийип, паникага алдырбаңыздар. Кырдаал туруктуу болуп, рейстер кайрадан башталгыча күтөбүз. Бул убакта дүйнөдө тынчтык, мусулмандар биримдиги жана өлкөбүздүн өнүгүшү үчүн дуба кылууну суранабыз», - деп айтылат билдирүүдө.
Мындан тышкары, умрага барууну пландап жаткан адамдардан болуп жаткан окуяларга көңүл буруп, региондогу кырдаал нормалдашканда гана зыярат кылуу мүмкүнчүлүгүн карап чыгууну суранышууда.
