Ош шаарында 2026-жылга карата бюджет долбоору боюнча коомдук угуу өткөрүлдү. Шаардык пресс-кызматы билдиргендей, жыйындын жүрүшүндө бюджет, экономика жана өнөр жай боюнча депутаттык комиссиянын төрагасы Кушбак Шайиев долбоорду сунуштады, ага ылайык жалпы бюджет 5 миллиард 205 миллион 536 миң 400 сомду түзөт. Бул 2025-жылдагы бюджеттен 1 миллиард 780 миллион 222 миң 600 сомго көп.
Кеңешмеде шаар тургундары социалдык колдоону жакшыртуу, инфраструктураны модернизациялоо, коомдук транспорттун ишин уюштуруу, электр камсыздоону жакшыртуу, жолдорду оңдоо жана экологиялык маселелерди чечүү боюнча сунуштар беришти, деп айтылат билдирүүдө.
Мындан тышкары, иш-чарада шаардык кенештин төрагасы Болот Баетов, биринчи вице-мэр Омурбек Торобаев, депутаттар, жергиликтүү кызматтардын өкүлдөрү, коомдук уюмдардын өкүлдөрү жана тургундар катышты.
