ТИМ алдын ала төлөмдү караштырбаганын жана эч ким Америка визасын алуу боюнча кепилдик бере албасын баса белгиледи. Төлөм интервьюдан кийин гана, Бишкектеги элчиликтин расмий шилтемеси аркылуу жүргүзүлүшү керек.
«Расмий маалыматтарга ылайык, бизнес же туристтик виза (B1/B2 категориясы) алуу үчүн биринчи кезекте АКШнын консулдук кызматкери менен интервью өткөрүү зарыл. Эгер консулдук кызматкер оң чечим кабыл алса, арыз берүүчү I-352 формасын толтуруп, Pay.gov расмий онлайн платформасы аркылуу финансылык кепилдик берүүгө макулдугун билдириши керек», — деп маалымдашты министрликтен.
Ошондой эле министрликтен кепилдик төлөмдүн өлчөмү интервьюдан кийин консулдук кызматкер тарабынан белгиленерин жана $5 миңден $15 миңге чейин өзгөрүп турушу мүмкүн экенин белгилешти. Эгер иммиграциялык статус өзгөрсө же АКШда болуу мөөнөтү ашып кетсе, кепилдик кайтарылбайт.
