Министр республикада электр энергиясынын жалпы өндүрүшү 15,4 миллиард киловатт-саат болгонун белгиледи. Бул көлөмдүн 12,9 миллиард киловатт-сааты гидроэлектр станцияларына, 2 миллиард киловатт-сааты Бишкектеги ТЭЦке, ал эми кичи ГЭСтер 450 миллион киловатт-саат өндүрдү.
«Элдин электр энергиясына болгон муктаждыгы 19,3 миллиард киловатт-саат. Калган 3,886 миллиард киловатт-саат жетишпестик Казакстан, Өзбекстан, Түркмөнстан жана Россиядан импорттоо аркылуу жабылды», — деп кошумчалады ал.
Ошондой эле министр НЭСКтин маалыматтарына ылайык, өткөн жылы тармакка 26 448 жаңы абонент кошулганын, бул 1 974 мегаватт электр энергиясын керектөөгө жооп берерин билдирди.
