Иш-чарага өкмөт башчынын биринчи орун басары Данияр Амангельдиев, Талас облусундагы президенттин ыйгарым укуктуу өкүлү Эрмат Джумаев, райондордун акимдери, шаар мэри, айыл өкмөттөрдүн башчылары жана мекемелердин жетекчилери катышты.
Жыйында быйыл облуста фасольди кайра иштетүүчү завод курула турганы маалым болду. Ошондой эле, 2025-жылы облус боюнча төрөлүү көрсөткүчү 167 балага төмөндөгөнү белгиленди.
Президенттин өкүлү Эрмат Джумаев облустук коллегиянын курамындагы өзгөртүүлөр тууралуу маалымдады. Андан соң 31-август 2026-жылы Таласта белгиленчү Эгемендүүлүк күнүнө арналган 20 долбоор боюнча презентация сунуштады.
Өткөн жылдын жыйынтыктары менен таанышуу үчүн өкүлдүн орун басары Максат Байджигитов сөз сүйлөдү. Анын маалыматына ылайык, социалдык мааниси бар азыктар боюнча бааларды туруктуу кармоо үчүн ар жумада ярмаркалар өткөрүлүп, эттин баасы туруктуу деңгээлде сакталган.
Тартылган инвестициялардын көлөмү 7 млрд 932,1 млн сомду түзүп, өсүш көрсөттү. Бюджеттин өсүү темпи 175,3% га жетти, салык жыйноо көрсөткүчтөрү өстү, ал эми жергиликтүү бюджет 90 млн сомго толукталды.
Кесипкерликтин колдоосу алкагында 102 ишкана курулуп, 500дөн ашык жумушчу орундар түзүлдү. Өнөр жай секторунда 6 ири ишкана пайдаланууга берилди.
Өкүлдүн орун басары Мира Сейдикеримова социалдык тармактагы жетишкендиктер тууралуу отчет берди. Анын маалыматы боюнча, 2025-жылы 51 энеден өлүм учурлары катталды, бул 2024-жылга салыштырмалуу 11 учурга аз. Туберкулез (106 учур) жана гепатит B (2 учур) оорусу төмөндөгөн. Ошондой эле, билим берүү, миграция, маалымат базаларын түзүү, «Социалдык контракт» программасы боюнча социалдык жардам алгандардын мониторинги, облустун спорттук жетишкендиктери, диний абал жана маданияттын өнүгүшү боюнча маселелер талкууланды.
Өкмөт башчынын биринчи орун басары Данияр Амангельдиев өз сөзүндө жалпы жыйынтыктарды оң деп баалады.
Коллегиянын чечими менен 2025-жылга социалдык-экономикалык өсүүнүн динамикасы оң деп таанылды. Жашоонун милдеттүү камсыздандыруусу, узакка созулган курулуштарды тездетүү, долбоорлорду сапаттуу ишке ашыруу, билим берүү деңгээлин жогорулатуу, үй-бүлөлүк зомбулукту алдын алуу жана калкты үзгүлтүксүз электр энергиясы менен камсыз кылуу боюнча пландар бекитилди.
2025-жылдын жыйынтыгы боюнча Манас району өткөөл Кызыл Туу жана 50 миң сомдук акчалай сыйлыкка ээ болду. Эң мыкты айылдык аймак Шумкар-Уя деп табылды (сыйлык 30 миң сом). Ч.Мамбетова атындагы бириккен ооруканасы 10 миң сом алды. Талас электр тармактарынын директору Акылбек Султанов «Эң мыкты жетекчи» деп таанылып, 5 миң сомдук сыйлыкка ээ болду.
