Сапарынын алкагында ал Ысык-Көл районунда жайгашкан Тору-Айгыр айылында болду. Бул жерде ал ОсОО «Бишкек Солар» компаниясы тарабынан ишке ашырылып жаткан күн электр станциясынын долбоорун изилдеди. Көргөзмө стенддеринде ага бул объекттин курулушу жана келечеги тууралуу маалыматтар берилди.
«Бишкек Солар» компаниясынын өкүлдөрүнүн маалыматы боюнча, электр станциясы чоң кубаттуулукка ээ болот. Курулуш иштеринин 80%ы аткарылган. Башында долбоор 36 айда бүткөрүлүшү пландаштырылган, бирок натыйжалуу иштин аркасында мөөнөт 24 айга кыскартылды.
Жылдык электр энергиясынын өндүрүшү 600 миллион киловатт-саатка жетет деп күтүлүүдө. Долбоорго болгон инвестициялар келерки жылдын февралына чейин 280 миллион долларга жетет. 100 мегаватт кубаттуулуктагы биринчи кезек 2026-жылдын августунда пайдаланууга берилет, ал эми кийинки кезектери 2027-жылдын августунда.
Андан кийин Адылбек Касымалиев Ысык-Көл районунда жайгашкан Кызыл-Орук айылында вьетнамдык «Рокс Энержи Глобал» компаниясы тарабынан ишке ашырылып жаткан дагы бир долбоор менен таанышып чыкты.
«Ысык-Көл-1» күн электр станциясынын курулушу 2025-жылдын сентябрында башталды. Бул амбициялуу долбоор жалпы 1 900 мегаватт кубаттуулукка жана 1,4 миллиард доллар инвестицияга ээ. Станция жылына 3,6 миллиард киловатт-саат экологиялык таза электр энергиясын өндүрөт деп күтүлүүдө.
Долбоор үч фазадан турат: биринчи фаза 150 мегаватт, экинчи фаза 450 мегаватт, үчүнчү фаза 1 300 мегаватт. «Ысык-Көл-1» күн электр станциясынын курулушун толук бүтүрүү 2028-жылга пландалууда.
Сапарынын жүрүшүндө Касымалиев инвесторлордун активдүүлүгүн жана долбоорлордун тез ишке ашырылышын белгиледи.
«Мен мындай кыска мөөнөттө долбоорлордун ишке ашырылышындагы жогорку динамиканы көргөнүмө кубанычтамын. Бул инвестор менен мамлекеттин натыйжалуу өз ара аракеттенүүсүнүн ачык мисалы. Премьер-министрлер кабинетинин инвесторлорго, биздин өлкөнүн экономикасына инвестиция салууга даяр болгон бардык шарттарды түзүүгө жана ар тараптуу колдоо көрсөтүүгө даяр экенин белгилегим келет, бул энергетика, инфраструктура же айыл чарба долбоорлору болобу», — деп жыйынтыктады ал.
