«Балдардын укугун коргоочулар лигасы» коомдук фондунун директору Назгуль Турдубекова Facebook баракчасында президент Садыр Жапаровго, өкмөт башчы Адылбек Касымалиевге жана Жогорку Кеңештин төрайымы Жылдыз Таалайбек кызына кайрылуу жасады. Бул кайрылууда ал үй-бүлөлүк зомбулукка каршы мамлекеттик саясатты күчөтүүнү сунуштады.
Анын пикири боюнча, мурда жасалган чараларга карабастан, үй-бүлөлөрдөгү зомбулук деңгээли жогору бойдон калууда жана төмөндөшү боюнча тенденцияны көрсөтпөйт. Кайрылууда укук коргоо органдарынын кылмыштар жасалгандан кийин аткарган иш-аракеттерине негизделген реактивдүү моделден, системалуу профилактикалык саясатка өтүү зарылдыгы белгиленет.
«Үй-бүлөлүк зомбулукка каршы күрөштү комплекстүү мамлекеттик стратегияга айландыруу керек, реакциядан профилактикага өтүү зарыл», — деп жазылган кайрылууда.
Назгуль Турдубекова зомбулук курмандыктарына «адвокат + психолог + социалдык кызматкер» принцибине негизделген аралыктан колдоо көрсөтүү моделин мыйзам жүзүндө бекитүүнү сунуштайт. Ал мындай көз караш укуктук коргоону гана эмес, ошондой эле курмандыктар үчүн психологиялык реабилитация жана социалдык коштоону камсыз кыларын белгилейт.Сунушталган демилгелердин арасында:
- үй-бүлөлүк зомбулук боюнча иштерде психологиялык коштоону милдеттүү түрдө бекиткен психологиялык жардам боюнча өзүнчө мыйзамды иштеп чыгуу;
- зомбулук боюнча ар бир окуя үчүн аралыктан команда менен милдеттүү иштөө мыйзам жүзүндө бекитүү;
- үй-бүлөлүк зомбулукту алдын алуу, тобокелдиктерди эрте аныктоо жана үй-бүлөлөрдү коштоо үчүн адистештирилген социалдык кызматкерлер институтун түзүү (балдарды коргоо мекемелеринен бөлөк);
- психологдордун жана социалдык кызматкерлердин ишмердүүлүгүн мамлекеттик каржылоо, ошондой эле мамлекеттик органдар аралык өз ара аракеттенүү боюнча так стандарттарды орнотуу.
«Бул Кыргыз Республикасында үй-бүлөнүн жана адам укуктарынын чыныгы корголушуна карата стратегиялык маанидеги кадам», — деп белгиленет кайрылууда.
Нурбек кызы Асыл
