Манас жана Токтогул райондорунда жаңы азык-түлүк жармаркалары өтүп, социалдык мааниси бар айыл чарба товарлары сунушталды.
Агроөнөр жай министрлиги тарабынан берилген маалыматка ылайык, жармарка жергиликтүү айыл чарба өнүктүрүү башкармалыктары жана айыл өкмөтү менен кызматташтыкта уюштурулган. Иш-чарада тургундар эт азыктары, жашылчалар жана жемиштер, ун, өсүмдүк майы, кант жана башка маанилүү азык-түлүктөрдү акылга сыярлык жана туруктуу баада сатып ала алышты.
Бул иш-чаранын негизги максаты калкты сапаттуу жана коопсуз азык-түлүк менен камсыздоо, ошондой эле маанилүү азык-түлүк товарларынын баасын стабилдештирүүгө жардам берүү жана ички рынокту колдоо болуп саналат.
Учурда республикада азык-түлүк коопсуздугу толугу менен камсыздалган. Социалдык мааниси бар товарлардын жетиштүү запасы бар жана өлкөдө азык-түлүк жетишсиздиги байкалбайт.
