Юстиция министрлиги «2025-жылдын 16-июлундагы № 417 «Үй-бүлөлүк зомбулуктан коргоо жана сактоо чаралары жөнүндө» Кабминдин токтомуна өзгөртүүлөрдү киргизүү тууралуу» аталышындагы Кабинет министринин токтому долбоорун талкууга сунуштады.
Бул документтин максаты — 2025-жылдын 15-октябрындагы № 214 мыйзамына ылайык, үй-бүлөлүк зомбулук кылган адамдарга электрондук көзөмөл механизмин киргизүү.
Жаңы мыйзам нормаларына ылайык, мыйзам бузгандар электрондук жана башка техникалык каражаттарды колдонуу менен көзөмөлдө болушу мүмкүн. Бул убактылуу коргоо ордерлерин жана сот тарабынан белгиленген тыюуларды жана чектөөлөрдү аткаруу үчүн зарыл.
Долбоордун негизги милдеттери төмөнкүлөрдөн турат:
- үй-бүлөлүк зомбулуктун курмандыктары үчүн коргоо чараларын күчөтүү;
- электрондук көзөмөл үчүн укуктук механизмди түзүү;
- кайталанган зомбулук жана куугунтук учурларын алдын алуу;
- укук бузуу профилактикасы үчүн санариптик каражаттарды киргизүү.
Долбоор сунуштайт:
- электрондук көзөмөлдү колдонуу боюнча регламентти бекитүү;
- Ички иштер министрлиги менен юстиция органдарынын ортосундагы өз ара аракеттенүү механизмдерин аныктоо;
- убактылуу коргоо ордерлерин аткарууну көзөмөлдөө боюнча бирдиктүү тартипти белгилөө;
- санариптик технологияларды эске алуу менен убактылуу коргоо ордеринин жаңы формасын иштеп чыгуу.
Долбоор ар кандай мамлекеттик органдардын өкүлдөрүнөн турган жумушчу топ тарабынан иштелип чыккан, ага Жогорку соттун, Башкы прокуратуранын, Ички иштер министрлигинин, Санариптик өнүктүрүү министрлигинин, Пробация департаментинин өкүлдөрү жана JUST4ALL эл аралык программасынын эксперттери кирген.
