Ысык-Көл облусунда, Кызыл-Суу айылында, суу камсыздоо тарифтерин негиздөө, финансылык пландоо жана абоненттер менен өз ара аракеттенүү уюштурууга арналган үч күндүк тренинг аяктады.
Агроөнөр жай министрлигинин маалыматына ылайык, тренингге жергиликтүү муниципалдык ишканалардын, айыл өкмөттөрдүн, кеңеш депутаттарынын, райондук структуралардын кызматкерлеринин жана айылдын активдүү тургундарынын өкүлдөрү катышты.
Окуу учурунда катышуучулар Кыргызстандагы суу камсыздоо боюнча мыйзамдык аспекттер, тарифтерди эсептөө методдору, финансылык пландоо, ошондой эле кызмат көрсөтүүлөрдүн өздүк наркын эсептөө жана биллинг системаларын колдонуу менен таанышышты.
Практикалык бөлүгү Excel программасында тарифтерди эсептөө боюнча топтук иштерди, реалдуу мисалдарды талдоону жана жыйынтыктарды сунуштоону камтыды. Ушул сыяктуу ийгиликтүү практиканын мисалы катары Ош облусунун Ноокат районундагы «Кыргыз Ата Булагы» муниципалдык ишканасы көрсөтүлдү.
Мындан тышкары, катышуучулар абоненттер менен иштөө, маалыматтык кампанияларды уюштуруу жана тарифтерди бекитүү этаптарын талкуулашты. Тренингдин жыйынтыгы боюнча алар алган билимдеринин маанилүүлүгүн белгилешти жана аларды өз иштеринде колдонууга даяр экендиктерин билдиришти.
