Иш-чарага Кыргыз Республикасынын мамлекеттик катчысы, президенттин администрациясынын, министрлер кабинетинин, Жогорку Кеңештин өкүлдөрү, ошондой эле Эл аралык компания National Educational Network (NEN) жана Улуттук илимдер академиясынын өкүлдөрү катышты.
Мамлекеттик катчы Арслан Койчиев өз сөзүндө тестирлөө пунктун түзүүнүн мамлекеттик тил саясатын ишке ашыруудагы маанилүүлүгүн белгиледи. Ал жаңы борбор жарандардын тилдик жана билим берүү жөндөмдөрүн баалоодо заманбап жана эл аралык стандарттарга жооп берген ыкманы камсыз кыларын айтты.
Улуттук тил боюнча комиссиянын төрагасы Мелис Мураталиев жаңы тестирлөө пунктунун ачылышы «Кыргызтесттин» мүмкүнчүлүктөрүн кеңейтүү менен кыргыз тилин санариптик форматта эл аралык стандарттарга ылайык баалоо үчүн шарттарды түзөрүн кошумчалады.
Иш-чаранын алкагында «Кыргызтесттин» директору Батма Топоева-Ставинская Эл аралык компьютердик тестирлөө пунктунун функциялары, техникалык мүмкүнчүлүктөрү жана эл аралык кызматташтык багыттары тууралуу презентация өткөрдү, ошондой эле катышуучулар тестирлөө процессин таанышууга мүмкүнчүлүк алышты.
«Кыргызтесттин» базасындагы жаңы тестирлөө пункту жарандарга заманбап тестирлөө кызматтарын сунуштап, актуалдуу талаптарга жооп берчү баалоо механизмдерин киргизет, алар мамлекеттик жана эл аралык деңгээлде таанылат.
