Бар болгон маалыматтарга ылайык, айрым студенттер онлайн режиминде төлөмдү бир гана жолу төлөп, андан кийин WhatsApp аркылуу чек сүрөтүн бөлүшүшөт. Натыйжада 10–20 адам бир эле чекти колдонуп, аны айдоочуга төлөмдүн далили катары көрсөтүп, автобустан чыгышат.
Бул практика айдоочулар үчүн олуттуу кыйынчылыктарды жаратып, коомдук транспорттогу тартипти бузат.
Ош шаардык муниципалдык автотранспорт ишканасынын басма сөз кызматы мындай мыйзам бузуу учурлары үчүн жүргүнчүлөрдү укук коргоо органдарына өткөрүп берерин маалымдады. «10–20 адамдан турган чет өлкөлүк студенттер автобуска кирип, алардын ичинен бирөө гана төлөмдү төлөп, чектин сүрөтүн жалпы топко жиберет. Калгандары айдоочуга ошол эле чектин сүрөтүн көрсөтүп, чыгышат. Эгер мындай учурлар аныкталса, биз бул жүргүнчүлөрдү милицияга өткөрүп беребиз. Аларга протокол түзүлүп, мыйзамга ылайык чаралар көрүлөт. Жакында болгон окуядан кийин бүгүн рейддер башталды. Эгер мыйзам бузуу учурлары катталса, биз жүргүнчүлөрдү ОВДга өткөрүп беребиз», - деп белгилешти ишканадан.
Ош шаардык ОВДсы болсо, социалдык тармактарда видео пайда болгондон кийин эки чет өлкөлүк студенттин аныкталганын жана алар менен түшүндүрүү сүйлөшүүлөрү жүргүзүлгөнүн билдирди. «Видео тарагандан кийин биз эки студентти аныктап, алар менен сүйлөшүү жүргүздүк. Маалымат жетекчиликке жеткирилди. Азыркы учурда жетекчиликтин көрсөтмөсү боюнча чет өлкөлүк студенттер жана коомдук транспортту колдонгон жарандар арасында иш жүргүзүлүүдө», - деп кошумчалашты ОВДдан.
Учурда коомдук транспортто төлөмдү төлөө эрежелеринин сакталуусун көзөмөлдөө катуулаштырылып, рейддер уланууда.
