Акыркы күндөрү коомдо авто мектептер жана айдоочулук күбөлүк алуу маселелери активдүү талкууланууда. Бул тема боюнча Президенттин администрациясынын маалыматтык саясат кызматынын жетекчиси Дайырбек Орунбеков пикирин билдирди. Анын айтымында, президент Садыр Жапаров жакында берген интервьюсунда актуалдуу маселелердин себептерин кеңири түшүндүрүп, бул көптөгөн талаш-тартыштарга чекит койду.
Орунбеков мурда кээ бир жеке авто мектептер интернет аркылуу нааразычылыктарын билдирип, жалган маалыматтарды таратып, өз позицияларына массалык маалымат каражаттарынын көңүлүн бурууга аракет кылганын белгиледи.
Ал ошондой эле 100 же 200 миң сомдук окуу акысы тууралуу ушактар чындыкка дал келбестигин баса белгиледи.
Учурда расмий түрдө окуу акысы 19 миң сом деп белгиленген. Окуучулар практикалык сабактар учурунда күйүүчү майдын чыгымдарын өздөрү төлөөгө милдеттүү.
Бул баа жеке авто мектептердеги теоретикалык жана практикалык окуунун жалпы наркы 35–36 миң сомго жеткенден кыйла төмөн, - деп кошумчалады ал.
