Генпланды иштеп чыгууда Бишкектин калкынын болжолдонгон өсүшү 1,32 миллион адамдан 2050-жылы 1,92 миллионго жетет деп эсептелген. Пландын алкагында турак жай жана коомдук-экономикалык аймактарды өнүктүрүү, ошондой эле транспорт, социалдык жана инженердик инфраструктураны жакшыртуу, шаар экологиясын жакшыртуу боюнча чаралар каралган.
Интернеттен алынган сүрөт
Долбоордун жобосунда аймакты функционалдык зонирлөө, келечектеги курулуштун параметрлери, ошондой эле экологияны коргоо жана маданий мурастарды сактоо боюнча талаптар камтылган. Бул документ мамлекеттик органдар үчүн милдеттүү болуп, борбордогу бардык келечектеги инвестициялык жана инфраструктуралык демилгелердин негизин түзөт.
Атап айтканда, генплан транспорт системасын модернизациялоо боюнча чараларды, анын ичинде айланма жолдорду куруу, «Манас» аэропортун жаңылоо жана шаардык темир жол, трамвай жана метробус сыяктуу тез жүрүүчү коомдук транспорт линияларын түзүүнү камтыйт. Пландын экологиялык бөлүгүндө табигый-экологиялык каркас түзүү жана суу объектилерин көрктөндүрүү каралган.
Бул документти даярдоодо Бишкек мэриясы 471 адам катышкан кеңири коомдук угуу өткөрдү. Талкуу учурунда жарандардан 564 идея жана сунуштар берилди. Кээ бир сунуштар эске алынды, башкалары шаар куруу себептеринен улам четке кагылды.
Долбоордун жобосу коомдук талкуу үчүн Бирдиктүү порталында жарыяланган жана келип түшкөн пикирлерди эске алуу менен кайра иштелет.
