Алынган маалыматтарга ылайык, Манас шаарындагы облустук клиникалык оорукананын, Базар-Коргондогу жана Кочкор-Атадагы ооруканалардын аймагында жайгашкан 32 административдик имарат жана 5 жер тилкеси мыйзамсыз өткөрүлгөн. Бул объекттер коммерциялык ишмердүүлүк жүргүзүү үчүн, анын ичинде медициналык борборлор, дарыканалар жана тез тамактануу жайлары катары пайдаланылган.
УКМК Кыргыз Республикасынын президентинин жарлыгына ылайык, социалдык инфраструктура объекттери жеке менчикке өткөрүлбөшү керек экенин баса белгиледи. Мындан тышкары, Жер кодексинин 44-беренесине ылайык, имараттар жана курулуштар аларга бекитилген жер тилкесинен бөлүнүп алынбайт.
Бул объекттерди мыйзамсыз өткөрүү жана пайдалануу учурунда бюджетке түшкөн ижара төлөмдөрү кыйла төмөн болгон, бул мамлекет үчүн сезилерлик финансылык жоготууга алып келди. Имараттар жана жер тилкелери мамлекеттик менчикке кайтарылган соң, ижара шарттары кайра каралып, бюджетке ижара түшүүлөрүнүн бир нече эсеге көбөйүшүнө алып келди.
Жүргүзүлгөн тергөө жана оперативдик иш-чаралардын натыйжасында аталган объекттер жана жер тилкелери мамлекеттин менчигине кайтарылды.
