Бул окуя Ысык-Көл облусунун Түп районундагы Мин-Булак айылында, 150 окуучуга ылайыкташкан Ислам Касмали уулу атындагы мектепте болду. Курулуш 2023-жылы башталган, подрядчы катары ОсОО "Энержи-Нур строй" компаниясы иш алып барган.
Министрликтин маалыматына ылайык, мектеп азырынча пайдаланууга берилген эмес. Чатырды орнотуу курулуштун акыркы этабында жүрүп жатканда, объект Ысык-Көл облустук архитектуралык-курулуш контролунун башкармалыгы тарабынан кабыл алынган эмес. Подрядчыга бир нече жолу эскертүүлөр берилген.
Окуя 2026-жылдын 18-январь түнүндө болуп, күчтүү кар жааш чатырдын бир бөлүгүнүн кулашына алып келди.
Окуянын натыйжасында ОсОО "Энержи-Нур строй" подряддык уюмуна жазуу түрүндөгү эскертүү берилди жана имаратты калыбына келтирүүгө милдеттендирилди. Министрлик чатырдын толук оңдолгонун маалымдады. Ошондой эле компанияга 200 миң сом өлчөмүндө айып пул салынды жана анын лицензиясын токтотуу маселеси комиссиянын жыйынында каралат.
Текшерүү жүргүзгөн ыйгарым укуктуу органдар тарабынан оң жыйынтык алынгандан кийин, объектти расмий пайдаланууга берүү пландалууда.
