Анын айтымында, пландалган аянтчалар Ботаникалык бактын Ахунбаев көчөсүндөгү бөлүгүндө жайгашат.
«Эски футбол аянтчасы Ботаникалык бак жаңыдан өнүгүп баштаган учурдан бери бар эле. Ошондуктан, жаңы аянтчалар мурдагы бар болгон аянтчаны калыбына келтирүү болуп саналат. Бул аймактын жалпы аянты 87 гектарды түзөт, ал эми футбол мини аянтчалары 16 сотка жерди ээлейт, бул Ботаникалык бактын жалпы аянтынын болгону 0,18 пайызын түзөт. Бул бакка олуттуу зыян келтирбейт деп үмүттөнөм», — деп кошумчалады ал.
Канатбек Абдрахматов Ботаникалык бактагы дарактарды кесүү маселесине да комментарий берди. Ал акыркы жылдары Ахунбаев көчөсүндөгү участоктун абалы начарлап кеткенин белгилеп, «бул жердеги чөптөрдү бульдозер менен алып салуу чечими кабыл алынды» деди.
«Мунун натыйжасында айрым пайдалуу өсүмдүктөр жок кылынган болушу мүмкүн. Бирок биз түзүп жаткан жаңы бакта, кыркылып алынган дарактар менен бирге, мурда ал жакта кездешпеген жаңы сорттор да отургузулат. Биз бир нече жылдан кийин жаңыланган Ботаникалык бактын кооз жана жагымдуу жерге айланарына үмүттөнөбүз», — деп жыйынтыктады НАН КРнин башчысы.
Ал ошондой эле Горький көчөсүндө жайгашкан Ботаникалык бакта илимий изилдөөлөр улантылып жатканын кошумчалады.
Мурда Ботаникалык бактын администрациясы президенттин иш башкармалыгы борбордук кире бериштин жанына, 7 Апрель көчөсүнүн боюна эки футбол аянтчасынын курулушун баштаганын билдирген. Участок таштуу жер жана суу жетишсиздиги себептүү токойлордун тамыр жайышына мүмкүнчүлүк бербегендиктен тандалган.
Эскерте кетсек, 2025-жылдын январь айында «Энвер Гараев атындагы Ботаникалык бак» илимий-изилдөө институтуна өзгөчө коргоого алынган табигый аймак статусу берилген. Тийиштүү чечимди өкмөт башчы Адылбек Касымалиев кол койгон.
