«Мен II топтогу майыпмын жана бир нече жыл мурун бөйрөк трансплантациясы боюнча операция өткөргөм. Мурда Германияда жашап, ал жакта дарыланганмын. 2026-жылдын февраль айында мага дагы бир операция пландалган, ошондуктан сотко чыгууга уруксат берүү өтүнүчү менен кайрылдым. Германиядан келген медициналык документтер жана жергиликтүү дарыгерлердин корутундулары болгонуна карабастан, судья Алмаз Жумагулов менин өтүнүчүмдү четке какты», — деди журналист.
Ал ошондой эле соттун чечими окулуп жатканда өзүнө жаман болуп, эсинен танганын белгиледи. Жакындары Баянды Улуттук госпиталга жеткирип, ал жерде биринчи жардам көрсөтүлгөндөн кийин үйүнө кайтып келе алды.
Баяндын айтымында, сот «Азаттыкка» берген кыска комментарийинде ага коюлган айыптоо оор эмес кылмыштар категориясына кирерин, бул да чечим чыгарууда эске алынганын билдирген.
2024-жылы Баян Жумагуловага расалык, этникалык же диний жек көрүү боюнча кылмыш иши козголгон. Натыйжада сот анын жашаган жерин таштап кетүүгө тыюу салган, бул чаранын алкагында чыгып кетпөө боюнча кол коюу каралган.
Журналисттин иши боюнча соттук териштирүү райондук сотто 1,5 жылдан ашык убакыттан бери ар кандай себептер менен уланууда.
67 жаштагы Баян Жумагулова II топтогу майып жана пенсияга чыкканга чейин «Азаттыкта» иштеген.
