«Чон-Кемин» табигат паркында кар барысын кайрадан жапайы табиятка чыгарды

Министерствонун маалыматтарына ылайык, сейрек кездешүүчү жырткыч 29-декабрда саат 23:20 чамасында Кемин районунда жайгашкан Боролдой айылында байкалган. Алдын ала маалыматтарга караганда, кар барысы тоодон түшүп, айылдагы даракка чыгып кеткен.

Адистер окуя болгон жерге чыгып, жаныбарды текшерип, анын канааттандырарлык абалда экенин тастыкташты. Кар барысын текшергенден кийин, аны «Чон-Кемин» табият паркынын табигый жашоо чөйрөсүнө кайра кайтарышты.

Ведомстводо кар барысы Кызыл китепке киргизилгендигин жана корголуучу түр катары эсептелинерин белгилешти. Жарандар жапайы жаныбарларды тапкан учурда тиешелүү кызматтарга дароо кайрылуунун маанилүүлүгүн жана өз алдынча аракет кылуудан качууну эскертишти.