Нарын шаарында музда коньки тебүүдөн жаракат алуу учурлары көбөйдү: Муз аянтчаларын уюштуруу боюнча талаптар

Кышкы мезгилдин башталышынан бери Нарын шаарында оор жаракаттар менен кайрылуулардын саны кескин көбөйдү.

Бул тууралуу Нарын облустук бириккен ооруканасынын травматология бөлүмүнүн ортопед-травматологу Айбек Манапбаев билдирди.

Анын айтымында, күнүнө орто эсеп менен 35 адам кайрылат, алардын 10-15и музда сызгычтан жаракат алган адамдар.

Балдардын саны көп. Азыр каникул мезгили болгондуктан, негизинен балдар жана өспүрүмдөр, баллондор менен сызгычта жүрүп, төмөнкү жаракаттарды алышат:

• бет жана мурдуна сызаттар,


• ердин жыртылышы,


• бел, омуртка, кол жана буттун сынуусу,


• мээ жаракаттары.

«Оор жаракаттардын саны абдан көп. Адамдар коопсуздук эрежелерин унутуп, сактыкты жоготуп жаткандай. Эки-үчтөн сызгычта жүрүп, бири-бирине урунушат. Аралыктар сакталбай жатат», - деди Манапбаев.

Ал муз аянтчаларын уюштуруу үчүн коопсуздук талаптары милдеттүү болушу керектигин эске салды:

«Трамплин курулду. Бул кооптуу. Коопсуздук биринчи орунда болушу керек. Биз ишкерлерге коопсуздук талаптарын сактоо негизги жоопкерчилик экенин айтып жатабыз. Ата-энелерге: балдарыңыздын кайда жана кандай ойноп жатканын көзөмөлдөңүздөр, - дедим».

Нарын облустук ТЖБнын пресс-катчысы Разалита Умарбековна Нарын облусунда 4 муз аянтчасы бар экенин, алардын ээлери менен түшүндүрүү иштеринин жүргүзүлүп жатканын билдирди.

«Нарын шаарында - 1 муз аянтчасы (шаардык деңгээлде колдонулат). Ак-Талаа районунда расмий түрдө 1 муз аянтчасынын ачылганы жөнүндө маалымдалган. Ат-Башы жана Жумгал райондорунда кыш мезгилинде табигый муздан убактылуу аянтчалар бар, бирок алар расмий спорттук объект катары катталган эмес. Ошондуктан алар "бар" катары эсептелбейт», - деди ал.

Муз аянтчаларын уюштуруу эрежелери жана талаптары: 

• Салык патенти.


• Айыл өкмөтү менен келишим (жергиликтүү өз алдынча башкаруу органы).


• Бишкек шаарында атайын окутуудан өткөндүгү тууралуу сертификат.


• Техникалык коопсуздук журналынын болушу.

1. Формасы

Түз, төрт бурчтуу аянтча.

Узун трассалар, жантайыштар, көтөрүлүүлөр жана түшүүлөр болбошу керек.

Эгер форма талаптарга жооп бербесе - маселе жабык.

2. Размери

Минималдуу: 20 × 10 метрден кем эмес.

Спорттук (коньки, хоккей ж.б.): 60 × 30 метр.

Размери кичине болушу мүмкүн, бирок "аянтча" түшүнүгүнө жооп бериши керек.

3. Муз катмары

Калыңдыгы: 5 см кем эмес.

Бирдей, жарыктарсыз.

Кар менен аралашкан муз кабыл алынбайт.

4. Түздүк

Абсолюттук түз бет.

Тешиктер, дөңгөлөктөр, көтөрүлүүлөр жана түшүүлөр болсо - талаптарга жооп бербейт.

5. Чектер

Аянтчанын четтери так белгилениши керек.

Тосмолор, бордюр же кар валдары менен корголушу керек.

«Кайсы тарапка болбосун чыгып кетүүгө» мүмкүнчүлүк берилбейт.

6. Коопсуздук

Жакын жерде дарактар, металл конструкциялар, зымдар жана башка тоскоолдуктар болбошу керек.

Балдар үчүн коопсуз зона каралышы керек.